2013/12/20

Soldata-errifak salgai daude Goierriko hainbat tokitan

iritzia: 
 

Urte osoko soldata baten, hilean 1000 eurokoa, zozketan parte hartzeko errifak salgai ditugu Goierriko hainbat tokitan. Errifak 2 euroan daude salgai eta errifa bakoitzak zortzi zenbaki ditu. Zenbaki saritua ONCE elkartearen 2014ko otsailaren 28ko zozketan saritutakoarekin bat datorrena izango da eta txartel sarituak hilabeteko epea izango du saria jasotzeko. Boleto saritua aterako ez balitz, ONCE elkartearen 2014ko apirilaren 3an saritutakoarekin bat datorrena izango da zenbaki saritua. Horrek ere hilabeteko epea izango du saria jasotzeko.


Honako tokietan topatuko dituzue errifak salgai:

Ataun: Troskaeta, Sutegi, Errotaundi, Urbitarte.
Beasain: Arrano, Basakana, Antzizar, Lauburu.
Idiazabal: Xume.
Itsasondo: Kaxintane.
Lazkao: Antsoategi, Alboka.
Legorreta: Olaso. 
Ordizia: Herrikoa, Arantxa, Kikoenea, Pottoka eta La Paz.
Segura: Elorripe.
Zaldibia: Joxepa.
Zegama: Itzala.

Erosi errifak AEKren alde!

2013/12/19

Hizkuntza aniztasuna

iritzia: 
Euskararen ginkana lehiaketan ari gara parte hartzen eta bigarren proban erronka polita jarri digute. Herri honetan hizkuntz aniztasuna badela azpimarratu dute eta horren erakusgarri bideo bat grabatu behar izan dugu. Bideoan euskaltegiko ikasle diren hiru lagunek euren burua aurkeztu digute eta honako esaldi hau esan dute euskaraz eta beste lau hizkuntzatan: hizkuntza aniztasunak aberatsago egiten gaitu. 

Ikusi, ikusi bideoa!


Zer iruditu zaizue? Gustatu al zaizue?


2013/12/18

Gabonetako postal lehiaketako sari banaketa izango dugu bihar Barrenan

iritzia: 
Urteroko legez, Gabonetako Postal Lehiaketa dugu martxan. Lehiaketa honen helburua euskal gabonen ezaugarriak eta pertsonaiak Ordiziako ikastetxeetako haurrei gerturatu eta postalen bidez lantzea da. Bide batez, euren jarduna ere gizartzeratzen dugu erakusketaren bidez. 

Jakintza eta Urdanetako 5. eta 6.mailako ikasleek eta DBH1koek hartu dute parte lehiaketan eta bihar jakinaraziko dizuegu ikastetxe bakoitzetik zein hiru saritu izan diren. Lehenengo saria lortzen dutenek Lazkaoko Gerriko liburu dendan erabiltzeko 60 euroko bonua eskuratuko dute, bigarren egiten dutenek 45 eurokoa eta hirugarren sailkatuek 30 euro. 

                                                      Iazko irabazleak
Animatu eta hurbildu sari banaketara irabazleak ezagutzera!

2013/12/12

XXIV. Liburu eta disko azoka izango da asteburuan Beasainen

iritzia: 
Euskal Liburu eta Disko Azokak izango dira asteburuan Goierriko bost herritan, tartean Beasainen. Beasaingoa XXIV.ena izango da eta Goiztiri AEK euskaltegiak eta Beasaingo Udalak elkarlanean antolatzen dugu. Beasaingo plaza azpian izango da azoka abenduaren 13tik 15era . Azokako produktuak  %15eko deskontuarekin erosi ahal izango dituzue, gainera. 


Ordizia, Segura, Beasain, Lazkao eta Segurako Liburu eta Disko Azoketako ordezkarien aurkezpen bateratua egin genuen joan den asteartean Beasaingo Igartza jauregian. Bertan liburu azoketako nondik norakoen eta egitarauen berri eman genuen. Hauxe izango da Beasaingo  liburu azokaren ordutegia eta egitaraua:

Abenduak 13, ostirala. 

10:00-13:00 / 17:00-20:00

12:00. Olentzeroren marrazki lehiaketako sari banaketa.
19:00. Bertso eskolako bertsolarien saioa.

Abenduak 14

11:00-14:00 / 17:00-20:00
 
Arratsaldean zehar, gaztaina jana eta bideo- txokoa , Herrirakoen eskutik.
 
18:30. Ilunabar literarioa. Literatur emanaldia Bergarako Idazle Eskola eta Goierriko Kastakoekin.
 
20:00. Asier Lopezen kontzertua. Diska berriaren aurkezpena. Igartza jauregian.

Abenduak 15

11:00-13:00 / 17:00-19:00
 
12:00 Trikitilariak

Egun osoan zehar: Bertso Txapelketa Nagusia ikusteko aukera plaza azpian egongo diren telebista pantailetan.



Animatu eta hurbildu azokara!



Beste herrietako azokei buruzko informazioa Goierriko Hitzan.

2013/12/09

III. Mintzodromoa egin dugu Beasainen

iritzia: 

Mintzodromoaren hirugarren edizioa, Euskararen Nazioarteko Egunean egin den bigarrena, izan zen joan den asteartean  Beasaingo plaza azpian. Beasaingo Udalak, AEK-k eta Beasaingo Udal euskaltegiak antolatzen du ekimen hau, hainbat helbururekin: egunerokoan euskaraz aritzen direnak euskaraz aritzeko ohiturarik ez dutenekin solasean aritzea, euskarari bere tokia ematea eta euskaraz aritzeko guneak eskura jartzea edo sortzea, edozein gairi buruz eta egunerokotasunean euskaraz aritu gaitezkeela jabetzea...

40 lagun inguru bildu ginen plaza azpian: AEK eta Udal euskaltegiko ikasle eta irakasleak, mintzalagunak, eragileak, bestelako herritarrak...Hiru gairen inguruan aritu ginen hizketan: makinak vs. pertsonak, Gabonak eta oporrak. Gai bakoitzari buruz aritzeko mahaiz aldatu genuen eta solaskide berriekin aritu ginen hizketan. Hitz egiten genuen bitartean, txokolate beroa ere hartu genuen barrenak berotzeko.




Solasean aritu ginen bitartean, Imanol Aizpuruak mintzodromoaren eta egunaren berezitasuna irudikatu zuen bere artelanaren bidez. Ekitaldiaren amaieran artelanaren aurrean talde argazkia atera genuen. 



Ordiziako ikasleek Euskararen Nazioarteko Eguneko ekitaldietan parte hartu dute

iritzia: 
Euskararen Nazioarteko Egunaren harira, hainbat ospakizun izan dira Goierriko herrietan. Ordizian herri lasterketa egin zuten asteartean eta asteazkenean elkarretaratzea plazan. Bertan euskararen inguruko manifestua irakurri zuten eta hiru kanta abestu zituzten: Euskal Herrian euskaraz, Aitorren hizkuntz zaharra eta Xalbadorren heriotzean. AEK-ko ikasleek lasterketan eta elkarretaratzean parte hartu zuten eta klasean ikasitako kantuak abestu zituzten.

2013/12/08

Abenduko lehiaketa

iritzia: 


Hilabete honetako galdera: Zein da Errigoraren udazkeneko kanpainaren leloa?

Saria: Errigoraren saskia, hainbat produktuz osatua: bi olio botila (bat ekologikoa), hiru piper poto (bat ekologikoa), potxak, kardoa, borraja, orburuak, bi zainzuri lata, tomate-pikillo saltsa (ekologikoa) eta barazki krema (ekologikoa).
2 olio botila (bat ekologikoa), 3 piper poto (bat ekologikoa), potxak, kardoa, borraja, orburuak, 2 zainzuri lata, tomate-pikillo saltsa (ekologikoa) eta barazki krema (ekologikoa). Kalitate oneneko produktuak dira. - See more at: http://www.guaixe.net/Albisteak.asp?IdNoticia=17798&IdHerria=16#sthash.WHvIb6xD.dpuf
2 olio botila (bat ekologikoa), 3 piper poto (bat ekologikoa), potxak, kardoa, borraja, orburuak, 2 zainzuri lata, tomate-pikillo saltsa (ekologikoa) eta barazki krema (ekologikoa). Kalitate oneneko produktuak dira. - See more at: http://www.guaixe.net/Albisteak.asp?IdNoticia=17798&IdHerria=16#sthash.WHvIb6xD.dpuf
2 olio botila (bat ekologikoa), 3 piper poto (bat ekologikoa), potxak, kardoa, borraja, orburuak, 2 zainzuri lata, tomate-pikillo saltsa (ekologikoa) eta barazki krema (ekologikoa). Kalitate oneneko produktuak dira. - See more at: http://www.guaixe.net/Albisteak.asp?IdNoticia=17798&IdHerria=16#sthash.WHvIb6xD.dpuf



Parte hartzeko azken eguna: abenduak 18.

Bidali zure erantzuna goierri@aek.org helbidera. Izen-abizenak eta telefono zenbakia zehaztu, mesedez.


Lehiaketaren laguntzailea:
                                 

2013/12/04

Euskarazko hitzik politena

iritzia: 

Euskararen Nazioarteko eguna aitzakiatzat hartuta, EGAko goizeko taldekoek euskarazko hitzik politenak aukeratu dituzte. Hauxek hautatu dituzte, euren kutunen artean:

- Haizea
- Askatasuna
- Bihotza
- Pottoko
- Izar
- Menderaezina

Zer iruditzen zaizkizue hitz hauek? Gustuko al dituzue? Zein da zuen hitz gustukuena?

Eman zuen iritzia!

2013/12/02

Euskararen astea ospatuko dute Ordizian

iritzia: 
Datorren asteartean,abenduak 3, Euskararen Nazioarteko Eguna izango da eta egun horren harira, hainbat ekintza izango dira abenduaren 10era bitarte, 'Euskara plazara' lemapean. 


Abenduaren 3an bertan 'Euskaraz bizi nahi dut' lasterketa herrikoia izango da Ordiziako Udalak, Kontseiluak eta Emaneurre taldeak antolatuta. Lehen Hezkuntzako 3. eta 4.mailakoak 18:30ean abiatuko dira eta alde zaharrari itzuli bat emango diote (375 metro). Lehen Hezkuntzako 5. eta 6.mailakoak, berriz, 18:45ean aterako dira korrika eta bi itzuli emango dituzte (750 metro). Azkenik, 19:00etatik aurrera, DBH1eko ikasleak eta nahi duten herritarrek bost itzuli emango dizkiote alde zaharrari (2.765 metro). Lasterketan parte hartzeko izen-ematea epea irekita dago baina egunean bertan ere eman daiteke izena, 17:00etatik 18:30era arte.


Hurrengo egunean, abenduaren 4an, 'Euskarak 365 egun' ekimen orokorrarekin bat eginez, konzentrazioa egingo da Plaza Nagusian, 19:00etan. Manifestua irakurriko da eta, jarraian, kanta batzuk abestuko dituzte. 

Animatu eta parte hartu ekintzotan!

Euskal Herrian euskaraz

iritzia: 
Ordiziako euskaltegiko goizeko eta iluntzeko ikasleek 'Euskal Herrian euskaraz' abestia kantatu dute, abenduaren 3an ospatuko den Euskararen Nazioarteko Egunaren harira. Azpiko bideoan dituzue ikasleak abesten. A zer ahots dotoreak dituzuen! Bejondeizuela!



Zer iruditu zaizue? Gustatu al zaizue? Eman zuen iritzia!


2013/11/27

Pertsonaia ezkutua

iritzia: 
Ormaiztegiko taldeko ikasleek ere pertsonaia ezkutua ekarri digute, nor den asmatzen saiatzeko. Azpian dituzue pistak:


- 1981eko abenduaren 12an jaio zen.
- Lemoan bizi da.
- Unibertsitatera ez zen joan.
- Mendiko munduan oso famatua da baina lehen eraikuntzan lan egin zuen.
- Ormaiztegin hitzaldi batean egon zen.

Nor da?

Bota zuen erantzunak iruzkinetan. Ea asmatzen duzuen!

2013/11/26

'Emakumea bertsolaritzan' hitzaldia izango da Ordizian

iritzia: 
 
Amaia Agirre bertsolariak emakumeak bertsolaritzan duen tokiaz arituko da solasean bihar, azaroak 27, Ordizian. Bere esperientzian oinarrituta, emakumeek bertsolaritzaren munduan duten tokiaz, euren kezkez, ezinez eta beste hainbat konturi buruz hitz egingo du Agirrek. Hitzaldia 19:00etan izango da, Barrena Jauregiko 7.gelan. 

Animatu eta parte hartu!


2013/11/25

Eman izena Beasaingo III.Mintzodromoan parte hartzeko!

iritzia: 
Abenduaren 3an Euskararen Nazioarteko Eguna ospatuko dugu eta Beasainen III. Mintzodromoa antolatu dugu Goiztiri AEK euskaltegiak, Beasaingo Udalak eta Beasaingo Udal euskaltegiak. Ekimen honetan euskara ikasleak, egunerokotasunean euskaraz hitz egiteko ohitura dutenak eta ez dutenak bilduko dira zenbait gairen inguruan hitz egiteko. Modu honetara, euskaraz hitz egiten dugunon sarea zabalduko dugu eta euskaraz arituko gara zenbait konturi buruz solasean. 


San Martin plazaren azpian elkartuko gara abenduaren 3an, 19:00etatik 20:00etara. Launaka eseriko gara mahaietan eta hiru gairi buruz hitz egingo dugu. Gai bakoitzari buruz hamabost minutuz arituko gara solaskide batzuekin eta hurrengo gaiaz hizketan aritzeko mahaiz eta solaskidez aldatuko dugu.

Mintzodromoan parte hartu nahi baduzue, eman izena osteguna baino lehen Goiztiri AEKren Beasaingo euskaltegian (943 88 93 40), Beasaingo Udaleko Euskara eta Kultura zerbitzuan (943 02 80 63) edota Beasaingo Udal euskaltegian (943 02 81 00). E-posta ere bidal dezakezue beasain@aek.org helbidera. 

Animatu eta eman izena!

EGA/C1 prestatzeko eta euskaraz hitz egiten hasteko ikastaroak

iritzia: 
EGAra edo HABEren 3.maila/ C1era aurkeztu nahi duzu? Oraintxe duzu azterketa prestatzeko aukera ezinhobea:

Ikastaroa: EGA prestatu 165 ordutan
Noiz: abenduaren 3tik ekainaren 19ra. Astearte eta ostegunetan, 18:00etatik 21:00etara.
Prezioa: 285 €.


Euskaraz hitz egiten hasteko eta oinarrizko ezagutza jasotzeko ikastaroak ere izango ditugu. A1 mailan aritu nahi dutenentzako 165 orduko ikastaroa eskainiko dugu:

Noiz: abenduaren 3tik ekainaren 19ra.
Astelehen, astearte eta ostegunetan, 14:30etik 16:30era.
Prezioa: 285€.

Egunerokoan beharrezkoak dituzten kontuak ikasiko dituzte: erosketak egiten, lagun eta senideekin elkarrizketa sinpleak, informazioa eskatu eta eskaerak egiteko inprimakiak bete...


Beste aldetik, etorkinek euskarara hurbilketa egiteko ikastaroa ere izango dugu. 60 orduko ikastaroa izango da abenduaren 9tik martxoaren 5era eta 18,50 euroko kostua du. 


Ikastaro hauetakoren batean izena eman nahi baduzu, abenduaren 1era arte duzu epea zabalik. Beasaingo euskaltegian (Urbialde plaza 7,behea/ 943 88 93 40) edota Ordiziako euskaltegian (Nafarroa Beherea,1/ 943 88 91 74) eman dezakezue izena. E-posta ere bidal dezakezue ordizia@aek.org edota beasain@aek.org helbidera.

2013/11/21

Ezetz asmatu!

iritzia: 
 

Beasaingo goizeko taldeko ikasleek Goierriko lau pertsonairen inguruko deskribapenak edo pistak sortu dituzte. Erronka bota dizuete, ea bakoitza nor den asmatzen duzuen.

1. Euskal Herrira itzuli eta preso sartu zuten Tolosan bere abestiek herriarengan pizten zuten sentimendu biziagatik. Karlisten gudari talde batean ere ibili zen.

2. 1889an jaio zen Ataunen eta 1991n hil zen jaioterrian. Apaiz ikasketak egin eta Teologian lizentziatu zen. Etnografia eta antropologiako lanei ekin zien Aralar mendialdean. Hiru unibertsitatetan honoris causa doktore izendatu zuten.

3. 1788ko abenduan jaio zen. Pertsonaia honek eskribau ikasketak egin zituen eta pertsona geldiezina zen. 1835eko apirilean Eliot ituna sinatu zuen.  

4. Lazkaon jaio zen  AbaliƱe baserrian. Gizon txikia zen baina bertsolari handia  

Ba al dakizue nortzuk diren? Utzi erantzuna azpiko iruzkinetan! Ezetz guztiak asmatu!
.

2013/11/20

Baserritarrez janzteko ideiak eta aholkuak jaso ditugu

iritzia: 


XIX.mendeko euskal jantzien inguruko saioa egin genuen atzo Beasainen, Ostadar dantza taldekoen partaidetzaz. Jantzien jatorriaz eta izan duten bilakaerari buruzko informazioa eman ziguten Ostadarrekoek saio hasieran, testuingurun kokatzeko. Jarraian, dantza taldeko zenbait kidek garai hartan erabiltzen zituzten jantziak soinean jarri zituzten eta nola jantzi behar den azaldu ziguten. Lehenbizi, gizonezkoen jantzien ingurukoak kontatu zituzten: abarkak nola lotu, nolako galtzerdiak jantzi, alkandora motak, gerrikoa nola lotu, txapela buruan nola kokatu... 



Ondoren, emakumeek erabiltzen zituzten jantzien inguruko xehetasunak aipatu zituzten: gonak nolakoak eta zein luzeratakoak, amantalak zein luzeratakoak, ilea nola bildu, buruko zapia edota bizkarrekoa nola jantzi...


Bertan bildutako ikasle eta herritarrek ideia ugari jasota joan ziren etxera eta Gabonetan dotore asko janzteko moduan daude orain. Kontuz, beraz, ea zer nolako itxurarekin ateratzen zareten orain! Bidali argazkia eta baloratuko dugu!

Argazki galeria hemen.

Neguko irakurle kanpaina martxan da

iritzia: 
Urteroko legez, neguko irakurle kanpainako katalogoa iritsi zaigu eta hainbat produktu dituzue bertan: liburuak, diskoak, hiztegiak...AEKren ikasle izateagatik, produktu hauek merkeago lor ditzakezue. Bertako produkturen bat eskuratu nahi izanez gero, azaroaren 27ra arteko epea duzue eskaera eta ordainketa egiteko.


Animatu eta erosi!

2013/11/15

Hainbat konturi buruz aritu gara hizketan Bixi-bixi irratsaioan

iritzia: 
Goiztiri AEK euskaltegikook Segura Irratiko Bixi-bixi irratsaioaren euskaltegien tartean kolaboratu ohi dugu hilean behin, eta joan den asteazkenean izan zen gure txanda. Euskaltegiko kide den Maitane Legarretak Errigoraren udazkeneko kanpainari buruz hitz egin zuen. Horretaz gain, azaroaren 5ean Ordizian Bertso Txapelketa Nagusiaren inguruan egindako saio didaktikoaz aritu zen solasean eta baita hilaren 19an Beasainen egingo dugun baserritar jantzien inguruko saioari buruz ere. 

Beste hainbat gai ere landu zituzten asteazkeneko Bixi-bixin: 'Tribuaren berbak' saio berria, UEMAren arnasgune tailerrak...

Entzun irratsaioa eta gozatu!


Denboraldiko saio guztiak hemen

2013/11/14

Azaroko lehiaketa

iritzia: 

Hilabete honetako galdera: Goierriko zein bost herritan egiten dira Liburu eta Disko azokak abenduan?

Saria: Abenduaren 13,14 eta 15ean egingo diren Liburu eta Disko Azoketako batean erabiltzeko 50 euroko bonua.

Parte hartzeko azken eguna: azaroak 30.

Bidali zure erantzuna goierri@aek.org helbidera. Izen-abizenak eta telefono zenbakia zehaztu, mesedez.


Lehiaketaren laguntzailea:
                                 

2013/11/13

Baserritar jantzien inguruko saioa izango dugu hilaren 19an Beasainen

iritzia: 



Gabonak gero eta gertuago daudela aprobetxatuz, baserritar jantziei buruzko saio didaktikoa antolatu dugu Ostadar dantza taldekoen laguntzaz. XIX. mendeko baserritarren erara janzteko eta jantziak moldatu ahal izateko aholkuak eta ideiak emango dizkigute Ostadarrekoek. Saioa azaroaren 19an izango da, 18:00etan, Beasaingo Andramendi ikastolaren gelan, AEK euskaltegiaren azpian (Urbialde plaza 7, behea).
 

 

Guztiok gonbidatuta zaudete saio honetara. Hurbildu saiora, hartara Gabonetan kalera dotore-dotore aterako zarete-eta! 

2013/11/12

Bixi-bixi irratsaioan izango gara bihar

iritzia: 

Goiztiri AEK euskaltegiak biharko Bixi-bixi irratsaioan parte hartuko du hainbat konturi buruz hitz egiteko. Alde batetik, Errigorak AEK, Ikastolen Elkartea eta Sortzen-Ikasbatuazekin batera martxan jarritako kanpainari buruz hitz egingo dugu. Dakizuen bezala, Nafarroa Hegoaldeko produktuak Euskal Herrian zabaldu eta bertako euskalgintzari laguntzeko, bertako produktuz betetako saskia eska daiteke azaroaren 14a baino lehen. 

Horretaz gain, azaroaren 5ean Ordiziako euskaltegian Bertso Txapelketa Nagusiaren inguruan egindako saioa didaktikoaz ere arituko gara solasean. Arkaitz Oiartzabalek bertso txapelketaren inguruan irakatsitako kontuen berri emango dugu, beraz.

Hauek eta beste hainbat kontu izango dira bihar Segura Irratiko Bixi-bixi saioan. Interesa baduzue, sintonizatu FM 89.5, 12:15etik aurrera. Entzun eta gozatu!

2013/11/07

Bertso Txapelketa Nagusia hurbildu digu euskaltegira Arkaitz Oiartzabalek

iritzia: 
 

Bertso Txapelketa Nagusiari buruzko saio didaktikoa izan genuen asteartean Ordiziako euskaltegian. Arkaitz Oiartzabal 'Xamoa' bertsolariak Txapelketa Nagusia jarraitzeko heldulekuak eman zizkigun ikasle eta irakasleei eta bertsolaritzaren mundura hurbildu gintuen. 

Txapelketa Nagusiak bertsolaritzan duen tokia azaldu zuen Oiartzabalek eta txapelketaren egituraren berri eman zigun. Horretaz gain, saioetan izaten diren ariketen nondik norakoak eta zeri erreparatu behar zaion ere jakinarazi zigun. Beraz, Txapelketa Nagusiko edozein saiotara joateko gertu gaude orain! Oiartzabalek Txapelketako saioren batera joateko gonbita egin zigun, baina bestelako saioetara (bertso afari, jaialdi...) joatera ere animatu gintuen, bertsolaritzaren zabaltasuna eta saio mota bakoitzaren berezitasunaz gozatzeko. 


2013/11/03

Bertso Txapelketa Nagusiari buruzko saioa izango dugu bihar Ordiziako euskaltegian

iritzia: 
Bertso Txapelketa Nagusia martxan da irailetik eta igande honetan Tolosara iritsiko da. Horixe izango da Goierritik gertuen izango dugun bertso saio. Aitzakia hori aprobetxatuz, Bertso Txapelketa Nagusiaren inguruko saio didaktikoa egingo dugu bihar, 18:00etan, Ordiziako euskaltegian. Arkiatz Oiartzabal 'Xamoa' bertsolaria izango dugu hizlaria eta berak irakatsiko dizkigu Txapelketaren egitura, ariketa mota ezberdinak, bakoitzaren ezaugarriak eta beste hainbat kontu. Bertsolaritza gosez gaude jada!


2013/10/31

'Nafar hegoaldeko uzta, euskarari puzka' kanpainaren aurkezpena egin dugu

iritzia: 

 
 
Nafar hegoaldeko uzta Euskal Herrian zabaldu eta Nafarroa hegoaldeko 'zona no vascofona' deritzon eremuko euskalgintzari diruz laguntzeko asmoz jarri du martxan Errigorak 'Nafar hegoaldeko uzta, euskarari puzka' kanpaina. Kanpaina honetan Ikastolen Elkartaren, Sortzen-Ikasbatuaz eta AEKrekin arituko da elkarlanean Errigora. Ekimen honen berri emateko aurkezpena egin dugu gaur eguerdian Goiztiri AEKren Ordiziako euskaltegian eta bertan bildu dira Goiztiri AEKren zuzendaria eta Lazkaoko San Benito, Beasaingo Andramendi eta Ordiziako Jakintza ikastolako ordezkariak. Azpian duzue aurkezpenaren nondik norakoa:



Produktu ederrez osatutako 50 euroko saskia eskuratu nahi baduzue, Goiztiri AEKren Beasaingo (Urbialde plaza 7, behea) edota Ordiziako (Nafarroa Beherea,1) euskaltegietan, Beasaingo Andramendi ikastolan, Ordiziako Jakintza ikastolan edo Lazkaoko San Benito ikastolan egin dezakezue eskaria azaroaren 14a baino lehen.

 
 
Animatu eta eskuratu saskia!
 
Informazio gehiago Errigoraren Facebook, Twitter eta Youtube-ko kontuetan edota Goiztiri AEKren Slideshare kontuan.

2013/10/30

'Amaren eskuak' filma izango da ikusgai Ordizian asteburuan

iritzia: 
Euskarazko 'Amaren eskuak' filma ikusteko aukera izango da astebukaeran Ordizian.Izenburu bereko Karmele Jaioren liburuan dago oinarrituta Mireia Gabilondok zuzendutako pelikula hau. Nerea da filmeko pertsonaia nagusia,  kazetaria ofizioz eta lana eta familia bizitza uztartu nahian dabilen ama. Ama memoria galtzen hasi eta ospitalera eramango dute. Nerearen bizitzako desoreka handitu egingo da orduan.

Honako egun hauetan ikusi ahal izango da filma Ordiziako Herri Antzokian:

Ostirala, 1: 19:30 -22:15
Larunbata,2: 19:30- 22:15
Igandea,319:30-22:15
Astelehena,4 : 19:30




Filmari buruzko informazio gehiago hemen.

2013/10/28

Zuhaitzen eta landareen inguruko lexikoa lantzen

iritzia: 

Ordiziako iluntzeko A2 mailako kideak zuhaitzen eta bestelako landareen inguruko lexikoa aberasten aritu ziren joan den astean. Deskribapenak zegozkien argazkiekin lotu zituzten eta bakoitzaren inguruko informazioa jaso zuten. Ondoren, kartoi meheetan itsatsi zituzten irudiak eta bakoitzaren deskribapenak idatzi zituzten argazki bakoitzaren ondoan. Azpiko argazkietan duzue egindako lanaren isla:


Orain kalera atera eta ikusten dituzten zuhaitzen eta landareen izenak esateko gai izango dira. Jarraitu horrela,koadrila!

2013/10/24

Udazkeneko kontuen berri Bixi-bixi irratsaioan

iritzia: 
Goiztiri AEK euskaltegiko irakasleok Segura Irratiko Bixi-bixi saioan kolaboratzen dugu, euskaltegion tartean, euskara aberasteko asmoz. Goiztiriko kide den Amaia Auzmendik hartu zuen parte joan den hasteko saioan eta udazken garaiko kontuen berri eman zuen. Entzun irratsaioa, euskara aberastu eta gozatu!


Ikasturte honetako irratsaio guztiak hemen

2013/10/23

Maria Luisa Gorrotxategiri merezitako agurra egin diogu

iritzia: 
Maria Luisa Gorrotxategi hogei urtez aritu da irakasle lanetan AEKn, lehendabizi hamar urtez Altsasun eta ondoren beste hamar urtez Goierriko Goiztiri AEKn eta, erretiratzeko garaia dela iritzita, amaiera eman dio irakasle ibilbideari. Urte hauetan guztietan egindako lana aitortu eta omenaldi xumea eskaintzeko asmoz, afaria egin genuen joan den ostiralean Ordiziako Argi Berri elkartean. Bertan bildu ginen Goiztiri AEKren irakasleak eta gau polita pasa genuen.


Afalondoren, Gorrotxategi zegamarrak Goiztiriko lankideok egindako oroigarria jaso zuen, azpiko argazkian ageri dena.




Mila esker guztiagatik, Maria Luisa, eta gozatu bizimodu berrian!

2013/10/21

Oraindik ere ikas dezakezu euskara praktikoa

iritzia: 



Ikasturtea urriaren 1ean hasi genuen eta hainbat mailatako taldeak ditugu martxan. Hala ere, euskara praktikoa ikasteko gogoz dagoenak badu oraindik ere lekurik Goierriko Goiztiri AEKn.

Martxan dauden taldeak:
  • Hasierako maila (A1): Ordizian, 18:00etatik 20:00etara
                                             Idiazabalen, 09:45etik 11:45era
  • A2 maila: Ordizian, 09:30etik 11:30era
                      Beasainen, 09:30etik 12:00etara
                      Ordizian, 18:00etatik 20:00etara
  • 1. maila (B1): Ordizian, 18:00etatik 20:00etara
  • 2.maila (B2): Beasainen, 18:00etatik 20:00etara
  • 3. maila (C1): Ordizian, 09:30etik 11:30era
  • Etorkinentzako AISA ikastaroak: Ordizian, 15:00etatik 17:00etara.
  • Autoikaskuntza edota on-line ikastaroak: maila guztiak eta ordutegi malgua.

Laster hastekoak:

  • Etorkinentzako AISA ikastaroa: Ordizian, 10:00etatik 12:00etara
                                                               Zaldibian, 14:30etik 16:30era.
  • Hasiera maila (A1): Ordizian, 14:45etik 16:15era.
  • Langabetuen taldea (A1/A2): azaroaren 4tik aurrera, 14:00etatik 17:30era. Doakoa. Izen-ematea: Ordiziako Euskara Zerbitzuan.
  • A2 maila: Zaldibian, 14:30etik 16:30era.
  • A2/B1 maila: Ormaiztegin, 18:30etik aurrera. Urriaren 23tik aurrera.
  • 2. maila (B2): Beasainen, 14:30etik 16:30era.
  • 3.maila (C1): Ordizian, 18:00etatik 20:00etara.

Animatu eta eman izena!

2013/10/18

Irakurketa tailerra egingo dute azaroan Beasainen

iritzia: 
Igartza saria irabazi zuen Goiatz Labandibarrek 2011n eta aurten kaleratu du 'Geltokiak edo helduta entzuteko abestiak' liburua. Narrazio laburrez osatutako liburu hau izango dute hizpide Beasainen egingo diren tailerretan. Lehendabizi, parte hartzaileak liburutegian elkartuko dira,19:00etan, liburuaren nondik norakoak komentatzeko eta, ondoren, Labandibar idazlearekin egingo dute tertulia azaroaren 21ean, 19:00etan, toki berean.


Bi saioetan edota saiotakoren batean parte hartzeko asmoa dutenek Beasaingo Udal Liburutegian eskura dezakete liburua.

Animatu eta parte hartu!

2013/10/16

Beasaingo Mintzalaguna egitasmoan izena emateko epea irekita dago

iritzia: 
Lagunartean euskaraz hitz egin eta euskara hobetzeko asmoa baduzu edota helburu hori dutenei lagundu nahi badiezu, Beasaingo Mintzalaguna ekimenean parte har dezakezu. Astean behin lagun horiekin elkartu eta mintzapraktika egingo duzu kafetxoa hartu, ibilalditxoa egin edota beste edozein ekintza egiten duzuen bitartean.


Mintzalaguna egitasmoan parte hartu nahi duzuenok urriaren 20a duzue izena emateko azken eguna. Beasaingo Udaleko Kultura eta Euskara sailera (943 02 80 63), Goiztiri AEKren Beasaingo euskaltegira (943 88 93 40) edota Beasaingo Udal euskaltegira jo dezakezue horretarako. Animatu eta eman izena!

2013/10/15

Euli-giro

iritzia: 


Uxue Alberdik 'Euli-giro' izeneko narrazio liburua kaleratu du Susa argitaletxearen eskutik. Alberdik helduentzako idatzitako hirugarren liburua da hau, 'Aulki bat elurretan' eta 'Aulki jokoa'-ren ostean. Susaren webgunean osorik irakurtzeko aukera duzue. Gozatu!

2013/10/11

Sarri, sarri

iritzia: 
Ruper Ordorika musikari oƱatiarrak 'Azukre koxkorrak' izeneko diskoa kaleratu berri du. Diskoan hainbat kanta ezagunen moldaketekin osatu du eta tartean da Kortatu taldearen 'Sarri, sarri'. Azpiko bideoetan dituzue Ordorikak egindako moldaketa eta Kortaturen abestiaren bideoa letra eta guzti. Zein duzue gustukoago?






Eman zure iritzia!

2013/10/09

Urriko lehiaketa

iritzia: 

Hilabete honetako galdera: Zenbat urtetik behin jokatzen da Bertso Txapelketa Nagusia?

Saria: Azaroaren 10ean Tolosan izango den finalaurreko saiorako bi sarrera.

Parte hartzeko azken eguna: urriak 31.

Bidali zure erantzuna goierri@aek.org helbidera. Izen-abizenak eta telefono zenbakia zehaztu, mesedez.

2013/10/02

Izan supermintzalaguna!

iritzia: 
2013-2014 ikasturteko Mintzapraktika egitasmoa abian da eta horren berri emateko kanpaina dibertigarria egin dute aurtengoan. Egunerokoan euskararen alde beren alea jartzen duten “supermintzalagunak” omendu nahi ditu aurtengo kanpainak. Jasone Mendizabal Topaguneko zuzendariak esan bezala, “ahalegin horri esker biziberritzen da euskara, eta superheroiak bezala, sarri ikusezinak izaten dira”.



Mintzalaguna egitasmoa euskaraz mintzatzeko ohitura dutenak eta mintzapraktika egin nahi duten pertsonak biltzeko programa da. Egitasmo honek hainbat helburu ditu: euskara hobetzea, gehiagotan erabiltzea, euskaraz bizitzea, normalizazioaren alde egitea, ingurune euskalduna sortu, indartu eta zabaltzea...

Astean behin biltzen dira egunerokotasunean euskaraz aritzen direnak eta euskara praktikatu nahi dutenak. Paseoan, kafetegian. parkean edo edozein lekutan elkar daitezke, eurek nahi dutena euskaraz egiteko. Asteroko hitzorduaz gain, noizean behin herriko beste mintzalagun taldeekin ere egiten dituzte irteerak, afariak, kirol ekintzak...


Ordizian mintzalagun izateko interesa baduzu, eman izena urriaren 30a baino lehen Hitzaro elkartean edota Ordiziako AEKn. Hitzaro elkartean 09:00etatik 13:00etara eman dezakezu izena 943 16 23 66 telefonoan edota hitzaro@gmail.com helbidera idatzita. AEKren kasuan Nafarroa Beherea kaleko euskaltegira jo dezakezue, 943 88 91 74 telefonora deitu edota ordizia@aek.org helbidera e-posta bidali.

Animatu eta izan supermintzalaguna!

2013/09/30

Bihar hasiko da 2013/14 ikasturtea

iritzia: 
Urriaren lehenengo egunean emango diogu hasiera 2013/14 ikasturteari. Urteroko legez, maila ezberdinetako ikasleak elkartuko dira euskaltegian, euren helburuak lortzeko asmoz:  ilobekin euskaraz hitz egitea, euskaraz idazten trebatzea, tituluren bat ateratzea...Ongi etorri euskaltegira eta zorte on denoi zuen ibilbidean!


2013/09/27

Dendetan eta tabernetan ere euskara praktikoa

iritzia: 


Euskaraz bizi nahi baduzu kalean, eman izena Goiztiri AEKn!