2017/12/22

Eguberri eta urte euskahaldun on!

Goiztiri AEK euskaltegiko kideok oporrak hartuko ditugu gaur, urtarrilaren 8ra arte. Beraz, Beasaingo eta Ordiziako euskaltegiak itxita izango ditugu, ez da eskolarik izango, eta bloga eta sare sozialak ez ditugu eguneratuko. Eguberri eta urte euskahaldun on!


Loteria tokatuko balitzait...

Auskalo taldekoek Gautxori taldearen galderari erantzun diote eta loteria tokatuz gero, zer egingo luketen azaldu dute.


Abenduko lehiaketaren zozketa

Abenduko lehiaketaren zozketa egin dute Beasaingo goizeko taldekoek eta Ixiar Eratsun izan da irabazlea. Antzerki Garairako bonua irabazi du eta horri esker ekimen honen barruan izango diren antzerki guztiak ikusi ahalko ditu. Zorionak, Ixiar!



Azkarrak taldearen askaria

Zaldibiako Azkarrak taldeak askaria egin zuen atzo urteko azken eskola egunean, urteari elkarrekin modu goxoan agur esateko.Tea edan zuten, eta Maroko eta Pakistan aldeko zenbait janari dastatu zituzten, hainbat gozorekin batera. 


Azkarrak izateaz gain, lotsati samarrak ere badirenez, batzuk bizkarrez agertu dira argazkian eta besteren batek ihes ere egin du. Ispiluari erreparatuz gero, ikusiko duzue argazkian falta dena.

Loteria tokatuko balitzaizue, zer egingo zenukete?

Gautxori taldekoak baldintza hipotetikoa lantzen ari dira, eta loteria tokatuko balitzaie, zer egingo luketen kontatu digute bideoan. 


Eta zuek, zer egingo zenukete?

Asmakizunaren erantzuna

Adarra taldekoek pare bat bideo grabatu zituzten bi lekuren inguruko pistak emanez eta beste taldeetakoek erantzun egin zuten iruzkinetan. Orain, Adarra taldekoek erantzun horiek zuzenak ziren ala ez adierazi dute azpiko bideoan. Ikusi eta ea zuzen zenbiltzaten!




2017/12/21

Banatu ditugu postal lehiaketaren sariak


Euskal Gabonak ardatz hartuta, postal lehiaketa antolatu ohi dugu urtero Ordizian, eta Jakintza eta Urdaneta ikastetxeetako 3,4,5 eta 6.mailako ikasleek parte hartu ohi dute. Euskaltegiko ikasleek egiten dute epaimahai lana eta aurtengoan ia 200 lanen artean aukeratu behar izan dituzte maila bakoitzeko garaileak. Atzo Ordiziako Barrena jauregian egindako sari banaketan eman genuen irabazleen berri.

  • 3.maila: Oihan Lezea
Ikasleei postal alaia, koloretsua eta dibertigarria iruditu zaie eta diseinua originala eta txukuna dela azpimarratu dute. Oso landua, oro har. 



Saririk ez izan arren, maila bakoitzean bakarra ematen delako, aipamen berezi bat ere egin nahi izan diote Mikel Velascoren lanari, oso txukuna eta landua iruditu baitzaie, Olentzero irudikatzeko oso modu originala erabilita.

  • 4.maila: Safi Chaudhary
Oso fina eta txukuna iruditu zaie ikasleei, ipuin bateko magia ekarri die burura bertako diseinu eta koloreek.


  • 5.maila: Antonio Jesus Puertas
Postal polita delako eta detaile zainduak dituelako aukeratu dute. Pertsonaia mitologikoa ere presente izan du. Testu polita du, diseinu ona eta ongi antolatua.



  • 6.maila: Garazi Zubiaurre
Postalaren diseinuagatik eta simetrien jolasagatik hautatu dute. Horretaz gain, pertsonaia mitologikoekin jolastu du eta etxeari ere erreferentzia egin dio zuhaitza jarrita. Sinplea da baina fina, kolore konbinazio politarekin. Oso lan txukuna eta garbia iruditu zaie ikasleei. 



Lehiaketan parte hartu duten lan guztiekin osatutako erakusketa ikusgai izango da Ordiziako Barrena jauregian urtarrilaren 4ra arte. Hurbildu eta gozatu lanekin!

Zorionak eta eskerrik asko parte-hartzaile guztiei! Bejondeizuela!

2017/12/20

Euskal kantugintza ezagutzen: Huntza

huntza bilaketarekin bat datozen irudiak

Ordiziako Adarra taldekoak euskal kantagintza ezagutzen ari dira eta aste honetan Huntza taldearen nondik norakoen berri izan dute. Horretaz gain, taldearen Elurretan kantua ere landu dute, hutsuneak betez.



Gautxori taldekoek eskuratu dute lehiaketaren saria

Azaroko lehiaketan Goierriko liburu eta disko azoketako batean erabiltzeko 50 euroko bonua zozkatu genuen. Ordiziako Gautxori taldeari egokitu zitzaion saria eta igandean Beasaingo euskal liburu eta disko azokan izan ziren erosketak egiten. Taldearen ordezkari lana egin zuen Espek, eta Usua irakasleak ere lagundu zion aukeraketarekin. Gozatu sariaz!

2017/12/19

Postal lehiaketaren sari banaketa

 
Iazko irabazleak

Gabonetako postal lehiaketaren sari banaketa egingo dugu bihar, hilak 20, Ordiziako Barrena jauregian, 18:30ean. Ordiziako 3,4,5 eta 6.mailako ikasleek euskal Gabonen gaia kontuan hartuta egindako lanak ikusita, maila bakoitzeko irabazle bana hautatu dute euskaltegiko ikasleek. Bihar jasoko dituzte sariak eta, horretaz gain, parte hartutako lan guztiekin osatutako erakusketa ere irekiko da, urtarril hasierara arte ikusgai egongo dena.

Bertara gonbidatzen zaituztegu guztiok!

2017/12/18

Sorginak taldea

Ordiziako Sorginak taldeak ere egin du aurkezpen-bideoa. Emakume alaiak ditugu, zalantzarik gabe!



Kontrapas abesten

Ordiziako Adarra taldeko kideek Kontrapas abestia kantatzeko gonbita egin zieten goizeko gainerako taldeei. Behar bezalako erantzuna eman zuten gainerako ikasleek ere, eta asteazken goizean euskaltegi aurrean bildu ziren kantua abesteko. Hona hemen emaitza:



Zer iruditu zaizue?

2017/12/14

Ikasleak kafea hartzen

Ordiziako Goazen eta Izar Berriak taldeko kideek eguneroko elkarrizketen lanketa egin dute. Euskaltegian kafe-makina daukagu eta ohikoa izaten da bertan kafea hartuz, etenalditxoa egin eta kideekin hizketan aritzea. Ikasleek ere saiakera egin dute horretan, bideoetan ikus daitekeen moduan.




2017/12/12

Liburu eta disko azokak asteburuan

Euskarazko liburu eta disko azokak izango dira asteburu honetan Ataunen, Beasainen, Lazkaon, Ordizian eta Seguran. Urteroko moduan, elkarlanean antolatu ditugu herri guztietakoak, 'Azokak batzen gaitu' lelopean. Euskarazko liburu, disko eta jolasak topatuko dituzue azoketan, %15eko deskontuarekin.

Beasaingoa, Goiztiri AEK euskaltegikook antolatzen dugu Beasaingo Udalaren eta Mirentxu liburu-dendaren laguntzaz. Aurten ere Gernika pasealekuan egingo dugu azoka, pilotaleku estaliaren parean. 

Ordutegia
  • Ostirala,hilak 15: 11:00-13:00 / 17:00-20:00
  • Larunbata, hilak 16: 11:00-14:00/ 17:00-20:00
  • Igandea, hilak 17: 11:00-15:00
Egitaraua

Ostirala
  • 11:00etan, Gabonetako kartel lehiaketaren sari banaketa.
  • 17:30ean, irakurle taldea. Mikel Etxabururen Lo zaudela zabaldu dizkizut begiak liburuaren inguruko solasaldia eta errezitaldia ondoren. 
Larunbata
  • 12:00etan, musika eskolako trikitilariak.
  • 13:00etan, Migel Angel Mintegiren June eta meategiko iheslariak liburuaren aurkezpena. Irene Kortaberria izango da aurkezlea.
  • 18:30ean, Kantujiraren saioa.
Beste herrietako egitarauak ere ikus ditzakezue Goierriko Hitzak prestatutako irudi honetan.



Hurbildu azokara eta parte hartu ekitaldietan. Azokak, euskarak eta euskal kulturak batzen gaitu!

2017/12/11

Kontrapas abestia kantatzeko gonbita

Jakintza ikastolako erakusketa bisitatu ostean, jakin-mina piztu eta gehiago sakondu dute Ordiziako Adarra taldekoek. Lore-jokoen inguruan lanketa egin dute eta Bernart Etxepare idazlea ere hobeto ezagutu dute. 



Horretaz gain, Etxepareren bertsoetan oinarritutako Kontrapas abestia entzun dute. Abestia gustatu eta gainerako taldeei gonbita egin diete asteazkenean, abenduak 13, 11:00etan, Ordiziako euskaltegi aurrean guztiok batera kantatzeko. Azpian duzue kantuaren bideoa, entseguak egin ahal izateko.


Ez ahaztu! Asteazkenean, 11:00etan, Ordiziako euskaltegi aurrean. Hasi eztarriak berotzen!

San Nikolas Txiki eguna ezagutzen



San Nikolas Txiki eguna ospatu ohi dute Seguran abenduaren 6an eta bertan izan ginen euskaltegiko ikasle eta irakasle batzuk. Laureano Telleria segurarrak egun honen inguruko jatorri eta tradizioei buruz hitz egin zigun.


Aurten San Nikolas Txiki izan den Amets Albizuk ere badu lotura jai honekin,  jantziak bere birramonak egindakoak baitira eta lan handia egin baitzuen ohitura honi eusten.


Herriko haurrak kalean gora eta behera ibili ziren San Nikolas Txikiren abestia abestu eta etxeetan zeudenei eskean.





Ondoren, Rafa Berasategik gidatzen duen erakusketa bisitatu genuen, Erraztiolatza erakustokia, hain zuzen ere. Bertan, herriaren historia ikus daiteke maketetan, arbasoen bizimodua eta usadioak, tresneria...



Talde-argazkia ere atera genuen txangoaren amaieran Rafa Berasategirekin berarekin. 


Mila esker, Segura edo Erraztiolatza, harreragatik, eta hurrengora arte!

2017/12/06

Gozozaleak taldearen aurkezpen-bideoa

Segurako Gozozaleak taldeak argazkia bidali zigun eta oraingoan aurkezpen- bideoa jaso dugu. Bideo polita bidali digute, gainera!



Euskararen jatorriari buruzko erakusketa



Ordiziako Jakintza ikastolako ikasleek euskararen jatorriari buruz eurek prestatutako erakusketara gonbidatu gintuzten, eta bertan izan ginen astelehenean.


Ikasleek gidatu gintuzten erakusketan barrena eta hainbat alorren inguruko kontuak ikasi genituen: euskararen kronologia erromatarren garaitik hona, euskararen jatorriari buruzko hipotesiak, euskal idazleak eta zer ekarpen egin duten, Barandiaran eta mitoak...



 

Jolasa ere egin genuen kanpoko hizkuntzetatik hartutako maileguen euskal ordainak asmatzeko. 


Goiz-pasa ederra egin genuen eta oso harrera ona egin ziguten, gainera, ikasleek. Mila esker eta hurrengora arte!

2017/12/05

Abenduko lehiaketa

Hilabete honetako galdera: Zein bertsolari goierritar arituko da kantuan 2017ko Bertsolari Txapelketa Nagusiko finalean?


Saria: Beasain eta Ordizian egingo den Antzerki Garairako bonua. Bonuak antzerki guztiak ikusteko balio du.

Parte hartzeko azken eguna: abenduak 20.

Bidali zure erantzuna:
  • E-posta: goierri@aek.eus
  • Whatsapp mezua: 607 635 687

Izen-abizenak eta telefono zenbakia ipini, mesedez.

Lehiaketaren laguntzaileak:

2017/12/04

Azaroko lehiaketaren irabazlea

Azaroko lehiaketan 28 lagunek hartu dute parte, eta gaur goizean egin dute zozketa Ordiziako Adarra taldekoek, bideoan ikus daitekeen moduan.



Ondo aipatu dutenez, Gautxori taldeak eskuratu du saria. Beraz, 50 euroko bonua izango dute abenduaren 15,16 eta 17an Goierrin egingo diren liburu eta disko azoketako batean erabiltzeko. Zorionak Gautxori taldea!


2017/12/01

Hainbat ekitaldi Goierrin euskararen eguna ospatzeko

 

Abenduaren 3an Euskararen Nazioarteko Eguna ospatuko dugu eta Goierrin hainbat ekitaldi antolatu dituzte gaurtik hasi eta igandera bitarte. Goierriko Hitzako lagunek herrietako egitarauak bateratu dituzte eta azpiko irudian daukazue jasota.


Merezi du eguna ospatzea baina gogoan izan 365 egun dituela euskarak eta datorren urtean ere oso kontuan izan beharko dugu! 

Zer leku da?

Ordiziako Adarra taldeko kideak leku batera nola hel gaitezkeen, txoko bat nolakoa den eta zergatik duten gustuko lantzen aritu dira eta, horren harira, asmakizun bideoa grabatu dute. Gure lana zer lekuri buruz ari diren asmatzea izango da! Idatzi iruzkinetan zuen ustez zer toki diren eta gero eurek esango digute zuzen gabiltzan ala ez.




Ea asmatzen duzuen! Idatzi iruzkinetan!

2017/11/29

San Nikolas Txikiren abestia

San Nikolas Txiki ospatuko dute Seguran abenduaren 6an eta euskaltegikook ere bertan izango gara, ospakizuna gertutik ikusi eta gozatzeko asmoz.


Zuei ere gonbidapena luzatu nahi dizuegu gurekin batera etortzeko baina, hori bai, abestiaren letra ikasi beharko duzue, goxokirik gabe geratu nahi ez baduzue, behintzat!


Azpian duzue orain dela urte batzuk Goierri Telebista eta Goierriko Hitzako lagunek egun honi buruz jasotakoa eta haurrak kantuan entzungo dituzue. Informazio gehiago ere topatu dezakezue hemen.


Larunbatean ospatuko da San Nikolas Txiki Eguna from GITB on Vimeo.

2017/11/28

Giza-katea Ordizian


Emakumeenganako indarkeriaren aurkako eguna dela eta, giza-katea egin genuen atzo Ordizian, Hiri Hezitzailea egitasmoaren barruan eta Kimetz emakumeen elkarteak gidatua.


Hainbat eragile eta herritar abiatu ginen Altamiratik pankartak eskuartean genituela, eta plaza nagusirano joan ginen.



Plazan ekitaldi xumea izan zen, hainbat elementu bildu zituena: dantza, aldarrikapenak, xingola moreak, kantuak...Azpiko bideoan dituzue euskaltegiko ikasle eta irakasleak, Xabi Solanoren 'Erre zenituzten' abestia kantatzen.



Ekitaldiaren irudiak Goierri telebistaren bideo honetan daude jasoak.
Argazkiak eta kronika Goierriko Hitzan

2017/11/27

Zergatik ikasi euskara: 2.irakaspena

Euskal Herriarekiko lotura identitario indartsua, eskola amaituz geroztik euskara erabili ez eta galtzeko beldurra, lan-aukerak ugaritzeko nahia, bizitzera joandako herri euskaldunean integratzeko gogoa, Euskal Herrira bizitzera etorri eta lurraldeko hizkuntza exotikoa ezagutzeko jakin-mina, etab.
Motibazio identitarioak, instrumentalak eta integratzaileak, guztiak dira baliozkoak euskararako bidea abiatzeko.

2017/11/24

Jaioberriak taldea


Zeraingo Jaioberriak taldeko kideek euren argazkia bidali digute eta argi erakutsi dute zergatik jarri dioten izen hori taldeari. Izan ere, AEKren ikaslerik gazteena izaten dute eskoletan eta beste bat ere bidean da. Gaztetasunean ez die inork irabaziko, alajaina!

2017/11/23

Emakumeen aurkako indarkeria salatzeko prestaketak

Larunbatean izango da emakumeen aurkako indarkeria salatzeko eguna eta Ordizian giza-katea egingo dute astelehen goizean. Altamira auzotik abiatu eta plaza nagusira joango dira eta bertan ekitaldia egingo dute. 


Ordiziako euskaltegiko kideak egun horretarako prestaketa lanetan aritu dira aste honetan. Iluntzeko ikasleek pankarta ederra prestatu dute, irudietan ikus daitekeen moduan. 




Pankarta egiteaz gain, Xabi Solanoren 'Erre zenituzten' abestia landu dute eskoletan eta giza-katean parte hartuko duten goizeko ikasleek entsegua egin zuten atzo. 



Zuek ere astelehenerako entseatu nahi baduzue, hemen duzue abestia. Lasai egon, jendartean banatuko ditugu-eta abestiaren letra duten paperak.


2017/11/22

Gozozaleak taldea

Segurako taldekoek ere bidali digute euren argazkia. Gozozaleak izena jarri diote taldeari eta argazkia ikusita, uler dezakegu zergatik.Urtebetetzeak ospatzeko prest izaten dira ikasle hauek, gozoak tartean direla, noski. Ah,eta, bide batez, zorionak, Iñaki!


2017/11/21

Lehiaketako irabazleak Artxipielago ikuskizunean


Urriko lehiaketan Artxipielago ikuskizunaren emanaldirako bi sarrera zozkatu genituen, eta Mirari Urrujulegi eta Andres Ajuria izan ziren irabazleak. Joan den ostiralean izan zuten sariaz gozatzeko aukera eta hainbat argazki bidali dizkigute. 


Kontuan izan azaroko lehiaketa ere martxan dagoela eta abenduan Goierrin egingo diren liburu eta disko azoketako batean erabiltzeko 50 euroko bonua zozkatuko dugula. Parte hartu!

2017/11/20

Zergatik ikasi euskara: 1.irakaspena

Lehenengo eta behin, garrantzitsua da jakitea euskara ikasi duten euskaldunak oso pozik daudela hizkuntza ikasi izanaz, harro, asebeteta.

Askok adierazi izan dute euskara ikasteak euskaldunengandik hurbilago sentitzen eta euskal munduan sartzen lagundu diela. Izan ere, bada Euskal Herrian mundu aberats bat euskaraz mintzo dena, euskara jakin ezean ezezaguna dena askorentzat. Beraz, euskara ikasi ahala mundu berri bat zabaltzen zaigu, parez pare, gure inguruan: gure eskualdean, herrian zein auzoan.

Askok diote, halaber, euskara jakiteak lan-aukera gehiago edo hobeak ekarri dizkiela. Euskara bada baliagarria, beraz, lanpostu bat lortzeko.

Beste batzuek agertu dute euskara ikasteak integratuago sentitzen lagundu diela; esate baterako, herri euskaldun batera bizitzera joan direnean.

2017/11/17

Abenduan hilabeteko ikastaro trinkoak Foruko barnetegian

Hizkuntza bat ikasteko ez dago hizkuntza hori hitz egiten den ingurunean murgiltzea bezalakorik. Hori dela eta, egunean 24 orduz euskaraz bizitzeko aukera ematen dizugu Foruko barnetegian: euskaraz gosaldu, bazkaldu eta afaldu; euskara eskolak jaso; eta, ordu libreetan, euskara hutsean bizi.

AEK-k ikasturte osoan eskaintzen dizu, urritik ekainera, barnetegian ikasteko aukera. Hilabete edo gehiago (120 orduko ikastaroak) egin dezakezu Foruko barnetegian (Bizkaia), Urdaibaiko biosfera-erreserban.



Abenduko ikastaroa: azaroaren 27tik abenduaren 22ra izango da. Maila guztiak! Datozen hilabeteotan ere aukera gehiago izango duzu. Ikusi hemen.

Prezioa: 536 euro, eskolak, egonaldia eta otorduak barne.

Informazio gehiago eta izen-emateak: gernika@aek.eus // 946 253 596

2017/11/15

Ikasturte honetarako eskaintza

Hauxe da Goiztiri AEK euskaltegian 2017/18rako dugun eskaintza. Ikasturtea urrian hasi bazen ere, badira orain dela gutxi sortutako taldeak ere. Interesik baduzu, eman izena lehenbailehen gure euskaltegietan


2017/11/13

Auskalo taldearen aurkezpena

Ordiziako Auskalo taldeko kideek euren buruaren aurkezpena egin dute. Barre ere egin dute bideoa grabatzerakoan. Ondo pasatu dutenik ezin ukatu!



2017/11/10

Errigoraren saskiak eskatzeko azken egunak




Azaroaren 14an, asteartean, amaituko da Errigoraren saskiak eskatzeko epea, beraz, egin lehenbailehen eskaera gure euskaltegian.