2015/12/23

Urte euskahaldun on!

iritzia: 
Oporrak hartuko ditugu gaur eta urtarrilaren 11n itzuliko gara kontu berriekin. Bien bitartean, ondo pasa Gabonak eta garai hau ere euskaraz gozatu. Urte euskahaldun on!


Euskaltegira ere iritsi zaigu oparia

iritzia: 


Olentzero laster iritsiko da geure etxeetara baina geuk aurreratutako oparia jaso dugu euskaltegian. Beasaingo ikasle den Gorkak liburu azokan erabiltzeko 50 euroko bonua eskuratu zuen azaroko lehiaketan. Berarentzat bi liburu erosi zituen eta baita euskaltegirako jokoa ere. 


Euskal Herriaren historia ederki ikasiko dugu eta, hori gutxi balitz, guztiok batera gozatuko dugu. Mila esker, Gorka!

Carlos Madrazo ikasleak lortu du abenduko saria

iritzia: 


Errigoraren kaxa zozketatu dugu abenduko lehiaketan eta Ordiziako ikasle den Carlos Madrazo izan da irabazlea. Hilero parte hartu ohi du lehiaketan, fin-fin, eta aritzen denak lortu egiten du azkenean! Bejondeizula, Carlos, eta gozatu sariaz!

Eguzkia eta jendea lagun Beasaingo liburu eta disko azokan

iritzia: 


Beasaingo 26. Euskal liburu eta disko azoka egin genuen asteburuan Gernika pasealekuan. Eguzkia lagun izan genuen asteburu osoan eta jendea  gerturatu zen azokara ostiraletik igandera. Liburu eta diskoen salmentaz gain, hainbat ekitaldi izan ziren azoka gunean. 


Ostiral goizean Gabonetako kartel lehiaketaren sari banaketa egin zen. Ander Kortaberriak irabazi zuen eta Maddi Urteaga, Irene Dominguez eta Amets Zurutuza ere saritu zituzten.


Arratsaldean, Irakurle taldeko kideak bildu ziren Uxue Alberdiren 'Aulki-jokoa' liburuari buruz hitz egiteko. 


Jarraian, Maddi Noguera ataundarraren musika emanaldia izan genuen. Gozatu ederra hartu zuten bertaratutako guztiek.


Larunbat goizean, berriz, Olentzero eta Mari Domingi izan genituen bisitan. Umeek musuak, besarkadak eta gozokiak jaso zituzten.


Arratsaldean, Largabistaren tailerra izan genuen eta umeek euren marrazkiez apaindu zuten ekitaldietarako karpa txikia. 


Ondoren, Maider Agirrek Bihotzero liburua aurkeztu zuen Irati Goikoetxearen gidaritzapean. Liburuko ilustrazioen egile den Idoia Beratarbide ere marrazten aritu zen aurkezpenean bertan.


Igande goizean Beasainen 400.urteurreneko bideo grabaketa egin zuten Igartzan. Arratsaldean, berriz, Kantujira taldekoak aritu ziren kantuan eta gerturatu ziren herritarrak gustura aritu ziren entzuten eta txalo jotzen. 19:00etan amaiera eman genion 26. Euskal liburu eta disko azokari.


Mila esker azokan erosketak egin edota ekintzetan parte hartu zenutenoi. Datorren urtean berriz izango gara elkarrekin eta, bien bitartean, jarraitu musikaz eta literaturaz gozatzen!

Ospakizun giroa urteko azken eskoletan

iritzia: 
Urteko azkeneko klase egunak izan ditugu egunotan eta ospakizun giroa sumatu da eskoletan: jan-edana, jolasak...Horren adibide dira Legorretako eta Idiazabalgo taldekoen argazki hauek. Bejondeizuela eta jarraitu horrela datorren urtean ere!


Ataungo ikasleak eskolako irratian izan dira

iritzia: 

Ataungo AISA taldeko irakaslea eta pare bat ikasle Ataungo eskolako Otsoa irratian izan ziren euren esperientziari buruz hizketan. 4.mailako ikasleek egin zuten saioaren gidaritza. Azpian duzue irratsaioa osorik; tartean, Josu Aldasoro artzainari egindako elkarrizketa. Entzun eta gozatu!



Gabonetako postal lehiaketaren sari banaketa egin dugu

iritzia: 

Euskal Gabonen postal lehiaketa antolatu ohi dugu urtero Ordiziako udalaren laguntzaz eta Jakintza eta Urdaneta ikastetxeko 3,4,5 eta 6.mailako ikasleek parte hartu ohi dute.

Astelehenean egin genuen sari banaketa Ordiziako Barrena jauregian eta hauek izan dira aurtengo sarituak:

  • 3.maila: Unax Santos
  • 4.maila: Garazi Zubiaurre
  • 5.maila: Garazi Etxeberria
  • 6.maila: Aitana Cabido
Ikasleen lanekin osatutako erakusketa zabalik egongo da Barrena jauregian  urtarrilaren 4ra arte.

2015/12/21

Gabonetako postal lehiaketaren sari banaketa gaur

iritzia: 
Urtero bezala postal-lehiaketa antolatu du Goiztiri AEK-k Ordiziako Udalarekin elkarlanean. Jakintza eta Urdaneta ikastetxetako 3, 4, 5 eta 6.mailako ikasleek hartu dute parte lehiaketan eta sari banaketa gaur izango da, 18:30ean, Barrenan. Animatu eta hurbildu!

Iazko irabazleak

2015/12/16

Asteburuan izango dugu Beasaingo liburu eta disko azoka

iritzia: 

Beasaingo 26. liburu eta disko azoka izango dugu asteburuan Goiztiri AEK euskaltegikook antolatuta. Azoka Gernika pasealekuan, frontoi estaliaren ondoan, jarriko den karpan izango da.

EGITARAUA

Ekitaldiz beteta datorkigu aurtengo azoka ere: irakurle taldearen saioa, musika, liburu aurkezpena...



Azoka ordutegi honetan izango da zabalik:
  • Ostirala, abenduak 18: 10:00-13:00 / 17:00-20:00
  • Larunbata, abenduak 19: 11:00-14:00 / 17:00-20:00
  • Igandea, abenduak 20: 11:00-14:00 / 17:00-19:00
Hurbildu azokara eta gozatu!

Azaroko saria euskaltegiko ikaslearentzat

iritzia: 
 

Azaroko lehiaketan Goierriko bost herrietako batean egingo diren liburu eta disko azoketako batean erabiltzeko 50 euroko bonua zozketatu genuen.  Saria Beasaingo goizeko taldeko ikasle den Gorka Gorrindori egokitu zaio. Zorionak, Gorka! Gozatu!

Argentinako euskaltzaleak

iritzia: 

2015/12/11

Abenduko AIZU aldizkaria

iritzia: 
Euskahaldunok, kalean da AIZU!. Euskal kulturak beti izaten du bere txokoa AIZU! hilabetekarian, baina, abenduko alean, protagonismo berezia izango du. Izan ere, hilabete honetan, Durangoko euskal liburu eta disko Azokan egongo diren nobedade eta ekitaldien berri eman digute. Azokaren urteurrenari arreta berezia eskainiko diote. Izan ere, mende erdiko historia ez da ahuntzaren gauerdiko eztula!

 
Elkarrizketa nagusia Goizalde Landabasori egin diote. Idazle eta kazetariak Babeserako kopia (Elkar) poesia liburua kaleratu berri du, bizitzan pilaturiko gomuten segurtasun kopia poetikoa egiteko asmoz. Gainera, poema horietan oinarrituta, ikuskizuna osatuko du Galder Perez eta Ane Zabalarekin.

Horretaz gain, AIZU!-kideek Durangotik harago jo dute eta bestelako gaiak izan dituzte hizpide, erreportaje eta albisteetan.

Abenduko 402. alea berezia da AIZU!rentzat; hilabete honetan, AEKren aldizkariak 34 urte bete baititu. ZORIONAK AIZU!!

2015/12/09

Beasaingo liburu eta disko azoka nobedadez beteta

iritzia: 

Gaur goizean aurkeztu ditugu Ordizia, Segura, Beasain, Lazkao eta Ataungo liburu azoketako egitarauak 'Azokak batzen gaitu' lelopean. Beasainen 26. Liburu eta disko azoka antolatuko dugu Goiztiri AEK euskaltegikook. Ezin ahaztu, noski, Beasaingo Udalaren, Mirentxu liburu-dendaren eta herriko beste zenbait eragileren laguntza, ezinbesteko baitugu ekitaldia burutu ahal izateko.

Aurtengo edizioan bi aldaketa nabarmen ditugu: alde batetik, data eta, bestetik, tokia. Azoka abenduaren 18an, 19an eta 20an izango da eta Gernika pasealekuan, pilotalekuaren ondoan, jarriko dugun karpan bilduko ditugu aurtengo nobedade nagusiak. Urteroko ohiturari jarraituz, produktu guztiek %15eko deskontua izango dute, Beasaingo Udalari esker. 

EGITARAUA
Ekitaldiz beteta datorkigu aurtengo azoka ere: irakurle taldearen saioa, musika, liburu aurkezpena...



Azoka ordutegi honetan izango da zabalik:
  • Ostirala, abenduak 18: 10:00-13:00 / 17:00-20:00
  • Larunbata, abenduak 19: 11:00-14:00 / 17:00-20:00
  • Igandea, abenduak 20: 11:00-14:00 / 17:00-19:00

 TXANDETARAKO BOLUNTARIOAK
Azokan jendea artatzeko txandak egin ohi ditugu baina itxita dagoen ordu-tarte batzuetan ere zaintza lana egin beharko dugu. Horretarako, elkarteetako kide zein herritarrei eskatu nahi genieke laguntza. Inor prest balego, bidal dezala e-posta beasain@aek.eus helbidera edota 943 88 93 40 telefono zenbakira deitu ahalik eta azkarren.


Animatu eta hurbildu azokara! Azokak batzen gaitu!

2015/12/04

Abenduko lehiaketa

iritzia: 



Hilabete honetako galdera: Nora bideratuko da Errigorarekin lortutako diruaren zati bat?

Saria: Errigorako kaxa.


Parte hartzeko azken eguna: abenduak 20.

Bidali zure erantzuna:
  • E-posta: goierri@aek.org
  • Whatsapp mezua: 607 635 687 
Izen-abizenak eta telefono zenbakia zehaztu, mesedez.
 
 
 
Lehiaketaren laguntzailea:


                                 
 

Beasaingo liburu eta disko azoka nobedadez beteta

iritzia: 

Durangoko azoka izango dugu asteburu honetan eta Goierrikoak ere ate-joka ditugu. Beasainen 26. Liburu eta disko azoka antolatuko dugu Goiztiri AEK euskaltegikook. Ezin ahaztu, noski, Beasaingo Udalaren, Mirentxu liburu-dendaren eta herriko beste zenbait eragileren laguntza, ezinbesteko baitugu ekitaldia burutu ahal izateko.


Aurtengo edizioan bi aldaketa nabarmen ditugu: alde batetik, data eta, bestetik, tokia. Azoka abenduaren 18, 19 eta 20an izango da eta Gernika pasealekuan jarriko dugun karpan bilduko ditugu aurtengo nobedade nagusiak. Urteroko ohiturari jarraituz, produktu guztiek %15eko deskontua izango dute, Beasaingo Udalari esker.

Aurkezpena datorren astean

Egitarauaren barruan, Irakurle taldearen saioa, musika, liburu aurkezpena, Irrien Lagunak eta beste hainbat kontu izango ditugu. Xehetasun guztiak abenduaren 9an, 11:00etan, emango ditugu Ordiziako Barrena jauregian. Goierriko bost azokak elkarlanean dihardugu aspalditik, 'Azokak batzen gaitu lelopean', eta datorren astean agerraldia egingo dugu azoka bakoitzaren berri emateko.

Herritarren laguntza zaintzarako

Azokan, jendea artatzeko txandak egin ohi ditugu baina itxita dagoen ordu-tarteetan ere zaintza lana egin beharko dugu. Horretarako, elkarteetako kide zein herritarrei eskatu nahi genieke laguntza. Inor prest balego, bidal dezala e-posta beasain@aek.eus helbidera edota 943 88 93 40 telefono zenbakira deitu abenduaren 11 baino lehen.


Azokak batzen gaitu!

Zunba, muralak....denetarik baina euskaraz!

iritzia: 
Euskararen eguna izan genuen atzo eta Goierriko herrietan hainbat ekitaldi izan ziren. Guk Beasain, Ordizia eta Lazkaokoak ditugu iruditan.



Ordizian zunba egin zuten goizean eta jende ugari bildu zen plazan nagusian. Garagartza plazan haur txikiak aritu ziren dantzan.


Arratsaldean, beste hainbeste kontu izan ziren Ordizian: argazki erraldoia, lasterketa herrikoia...


Beasainen AEK eta Udal euskaltegiko ikasleak bildu ziren plaza parean eta euskararen aldeko esaldiz, argazkiz, marrazkiz...apaindu zituzten panelak. AEK-ren ikasleak fin-fin aritu ziren lanean eta testu eder hau sortu zuten:


Iluntzean ere gauza bera egin zuten herritarrek. Amaitzeko, argazkia atera zuten.


Ospatzea ederra izan ohi da baina gogoratu euskarak 365 egun dituela!

2015/12/03

Gaur, bihar, etzi...euskara praktikoa!

iritzia: 

Elgoibarren ere euskaratik eta euskaraz

iritzia: 


Ederra, ezta?

Eta gogoratu, 365 egun euskaraz. Datorren urtean 366!

365 egun euskaraz bilaketarekin bat datozen irudiak

2015/12/02

Euskararen eguneko ekitaldiak Ordizian eta Beasainen

iritzia: 
Goierriko herrietan hainbat ekintza antolatu dituzte Euskararen egunerako. Beasaingo eta Ordiziakoen berri duzue hemen:

ORDIZIA

Ordizian aste guztian izango dira ekitaldiak. Abenduaren 3rako hau antolatu dute:

  • Zunba saioa. 10:45etatik aurrera Ordiziako ikasle guztiak bilduko dira euskaraz bizi nahi dut zunba saioa dantzatzeko. Lehen hezkuntza, bigarren hezkuntza eta batxilergoko ikasleak Plaza Nagusian bilduko dira eta haur hezkuntzako ikasleak Barandiaran plazan.
  • Argazki erraldoia: 18:15ean Ordiziako kirolariak bildu nahi dira argazki erraldoia egiteko. Ahal bada, taldeko ekipazioarekin.   
  • EUSKARAZ BIZI NAHI DUT lasterketa herrikoia: 18:30etatik aurrera, eta azkeneko urteetan bezala, lasterketa herrikoia antolatu da hiru maila desberdinetan. Lasterketa ez lehiakorra denez, euskara izango da irabazle bakarra. Bukaeran hainbat sari zozketatuko dira. 

     

    Informazio gehiago hemen

    BEASAIN
    Muralak edo sare panelak jarriko dira Beasaingo plaza azpian eta bertan euskararekin lotutako esaldiak, leloak, marrazkiak, argazkiak jarriko dituzte herriko taldeetako kideek zein bestelako herritarrek. Goizean euskaltegietako ikasleek jantziko dituzte muralak. Herriko ikastetxeek ere izango dute aukera gelan landutako mezuan bertan txertatzeko. 

    Arratsaldean, 18:00etatik 19:30era, herriko elkarte eta bestelako herritarren txanda izango da. Kantujirako taldeak girotuko du ekitaldia eta Iñaki Mozok esatari lanak egingo ditu. 19:30ean parte hartzaile guztiekin argazkia aterako da.

    Horretaz gain, merkatari eta ostalariei Nirekin euskaraz txapak banatu zaizkie herritarrek eurekin euskaraz egin dezaten.

    Euskaraz bizi nahi dugu!

2015/12/01

Geuk be ondarrutarrez

iritzia: 
Ondarrutarrek bideo dotorea egin dute Euskararen egunerako. A zer nolako ereduak! Gora Ondarru eta ondarrutarrak, noski!


Euskarari buruzko bideo-erreportajea Hitzan

iritzia: 
Euskararen egunaren harira, Lea-Artibaiko Hitzak bideo erreportajea egin du. Bertan, Itxaso Beitiak (Lea Artibaiko AEK-ko irakasle eta zuzendaria), Victoria Calvok eta Desi Fernandezek (AEK-ko ikasleak) eta June Lauzirikak (Lea-ArtiBAI Euskarari) parte hartu dute.

Besteak beste, honako gai hauek jorratu dituzte: Lea-Artibai euskararen arnasgune izateak dituen onurak, Berbalagun egitasmoa, EGA... 



Ikusi eta eman iritzia!

2015/11/26

Kruxpeta ederrak egin ditugu Arriaranen

iritzia: 


Kruxpetak egiten ikasi genuen Arriarango Intxaurpe elkartean atzo egindako ikastaroan. Asel Ibañez gozogilea izan genuen irakasle eta pausoz pauso erakutsi zigun dena: krema eta orea nola egin, kruxpetak nola frijitu eta nola bete. 



Saioan parte hartutakoek oharrak fin-fin hartu zituzten eta hementxe duzue kruxpetak prestatzeko egin beharrekoa:


Prestatu eta gero, bertan bildutako 30 lagunek gozoa dastatzeko aukera izan zuten. Zer goxoa!


2015/11/24

Netflix euskaraz: sinadura bilketa

iritzia: 
netflix1

Urrian iritsi zen Netflix, filmak eta telesailak nahieran eskaintzen dituen plataforma digitala, Hego Euskal Herrira. Euskarazko edukirik ez dago, ordea, eta hori aldarrikatzeko sinadura bilketa jarri du martxan Euskara taldeak.


wFbTFCAmYSBAmyM-800x450-noPad 

Guztiok sina dezagun, euskaraz bizi nahi baitugu!

2015/11/23

Barnetegi txikia Lekeition

iritzia: 
Euskara ikasi, lagun eta toki berriak ezagutu eta ondo pasatu nahi al duzu? Lekeitioko barnetegi txikian duzu aukera! Euskara praktikoa ikasteaz gain, giro euskahaldunean murgiltzeko aukera izango duzu Lekeition. 



Barnetegia Gasteizko AEK-ko lagunek antolatu dute Lekeitioko Trinkete aterpetxean, abenduaren 5etik 7ra.

Informazioa eta izen-ematea: egingoaldugu@aek.org

Ez galdu aukera eta atera euskara plazara!

2015/11/19

Euskaldun berriei aitortza

iritzia: 

Euskararen Nazioarteko eguna abenduaren 3an izaten da eta euskaldun berri guztiei eskerrak emateko asmoz, Euskaldun Berria kalea ekimena jarri dute martxan. Euskara ikasi izanari esker, euskaldun berriek denoi ahalbidetzen digute gure hizkuntza erabiltzen jarraitzea: etxean, lanean, lagunartean eta, batez ere, kalean.


Euskaltegi edo eskolatik ateratzean euskaraz egiten jarrai dezagun, Euskaldun Berria deituko den kale bat, parke bat, plaza bat, kiroldegi bat...izango dute. Udalerri bakoitzak espazio bat eskainiko die euskalduntzearen abenturan murgilduko diren horiei.


Eskerrak emateko modua da, aurrera egiten jarraitzeko aitzakia. Bihotzez egindako aitorpena. Eskerrik asko euskararen taupada izateagatik, euskahaldun!

2015/11/17

Euskaraz badakigu, zergatik ez gara euskaraz bizi?

iritzia: 

Hamaika Telebistakoek "Euskaraz badakigu, zergatik ez gara euskaraz bizi?" izeneko erreportajea egin dute. Lutxo Egia idazleak, Oihana Bartra bertsolariak eta Fermin Etxegoien kazetariak gaiaren inguruko hausnarketa egin dute. 


Zer iruditu zaizue? Ados al zaudete bideoan esandakoekin? Eman zuen iritzia.

2015/11/16

Kruxpetak egiten ikasi nahi al duzu?

iritzia: 
 

Gozozaleentzat saio polita izango dugu prestatu dugu,  nataz eta kremaz beteriko kruxpetak egiten irakatsiko baitigu Ansel Ibañez gozogileak. Ikastaroa Beasaingo Arriaran auzoko Intxaurpe elkartean izango da hilaren 25ean, 18:00etatik 20:00etara.




Interesa duzuenok, azaroaren 23ra arteko epea duzue Goiztiri AEKren euskaltegietan izena emateko. Ikastaroaren prezioa 3 eurokoa da.

Animatu eta azkar ibili,parte hartzaileen kopurua mugatua da eta!

2015/11/13

Azaroko lehiaketa

iritzia: 



Hilabete honetako galdera: Zer idazlerenak dira Bihotzero eta Mundua betetzen zenuten liburuak?  

Saria: Goierriko Liburu azokaren batean erabiltzeko 50 euroko bonua.

Parte hartzeko azken eguna: azaroak 30.

Bidali zure erantzuna:
  • E-posta: goierri@aek.org
  • Whatsapp mezua: 607 635 687 
Izen-abizenak eta telefono zenbakia zehaztu, mesedez.

2015/11/11

Urriko lehiaketaren irabazlea

iritzia: 
Urriko lehiaketan Kalakan eta Oreka Tx taldeek ostiralean emango duten kontzerturako bi sarrera zozketatu genituen. 16 lagunek hartu zuten parte eta guztiek asmatu zuten erantzuna. Parte hartzaileek esan bezala, Goiztiri AEKk Ordiziako Nafarroa Beherea kalean eta Beasaingo Joxe Migel Iturriotz kaleetan ditu egoitzak. Ordiziako iluntzeko ikasleek egin zuten zozketa eta beraiek atera zuten irabazlearen izena: Eba Etxebarria. Zorionak, Eba, eta gozatu ostiraleko kontzertuaz!



2015/11/10

EGA edo C1eko azterketa prestatu nahi al duzu?

iritzia: 


EGA edo HABEko C1 agiria lortzeko asmotan al zabiltza? Oraintxe duzu azterketa prestatzeko aukera Goiztiri AEKn!

  • Ikastaroa: azaroaren 24tik ekainaren 23ra. 165 ordu.
  • Egunak: asteartea eta osteguna.
  • Ordua: 09:30- 12:30 edo 18:00-21:00
  • Prezioa: 294 €
  • Matrikulazioa: azaroaren 20ra arte



Eman izena!

2015/11/09

Euskaltegian ditugun taldeak

iritzia: 


Urrian hasi dugu ikasturtea eta martxan dira talde asko. Hala ere, oraindik izena emateko garaiz zabiltza! Hona hemen aukerak:


Animatu eta eman izena!

2015/11/06

AIZU aldizkariaren azaroko alea

iritzia: 
azala 

AIZU aldizkariaren azaroko alea ere kalean dugu jada.  Azalean Asier Altuna zinema zuzendaria ageri da, bera baita elkarrizketa nagusiko protagonista. Horretaz gain, Joseba B. Lenoir musikariari egindako elkarrizketa, albiste laburrak, erreportajeak, kritikak eta beste hainbat kontu topatuko dituzu.